Од 15-тина домашни дизајнери, само (или дури) четворица презентираа машки креации на неодамна завршениот Моден викенд-Скопје. Процентуално ова е можеби најбогатото издание на FWSK со колекции со машки модели, но сè уште e далеку од потребата на овој пазар за автентична машка мода. Ирина Тошева и Никола Петровски, традиционално, во рамки на своите сезонски колекции лансираа и модели за момчиња. Ист е случајот и со македонскиот креатор кој живее и работи во Бангкок, Јован Петровски, кој по неколку години пауза се врати на оваа манифестација. Кaко и во своите претходни ревии, и овој пат голем дел од својата колекција ја посвети на машкиот пол. Јована Филиповиќ, пак, како противтежа на својата приказна за дивата, страствена страна на свремените жени, понуди неколку машки креации, што е исчекор напред во нејзините презентации.
Од колекцијата „Зебра“ на Ирина Тошева
Колекцијата „Зебра“ за есен-зима 2014/15 на Тошева, која покрај на Модниот викенд-Скопје беше претставена и во рамки Fashion Week Serbia, понуди два целосни машки стајлинзи, првиот со принт на зебра што се повторува на кошула, како и комбинезон. И во првите редови на ревијата можеа да се видат креации произлезени од оваа линија. Моделите се младешки, ведри и во духот на приказната на колекцијата-посветена на индивидуалци што осткокнуваат од околината.
Креации за пролет-лето 2015 на Никола Петровски
Полова рамноправност секогаш има во колекциите на креаторот од Битола, Никола Петровски, кај кој машките и женските модели се надополнуваат и прават една целина. Како и во претходната летна колекција, дизајнерот за машките понуди креации со принтови што доловуваат ведра летна приказна. Обој пат покрај шорцевите имаше и дуксери, како и кошули со апликации. Моделите се за похрабри мажи и момчиња, што сакаат да бидат забележани.
Машките модели како противтежа на женската линија на Јована Филиповиќ
Двете машки комбинации што ги претстави Јована Филиповиќ се урбани, со модерен крој и со уникатен дизајн. Во нив би се препознале мажи што негуваат различни стилови. Тие се удобни и практични со диксретна спостка нота, наменети за оваа зима. Покрај панталоните, шорцевите и кошулоте, кои најчесто се појавуваат во машките линии на нашите дизајнери, таа направила и современ капут, со квалитетен и автентичен крој.
Од линиите SQUIRE и Blackout на Јован Петровски
Јован Петровски во Скопје претстави модели од двете линии, SQUIRE и Blackout на кои работи во Бангкок. Во основа креациите се црни или монохроматски, со бели и индиго сини комбинации. Понуди широка палета од модерни минималистички машки кошули, блузи и панк панталони . Дел од креациите се со принт-костурска глава. Динамиката ја нагласил кај формите, па така кошулите и панталоните не со во класичен крој, но не отскокнуваат многу од линијата на телото. Ова се креации за човекот од иднината, кој не им робува на навиките, дрескодовите и стилските ограничувања.
Нема коментари