Еден од најголемите трендови од 90-тите кои се вратија во уличната мода оваа есен се торбичките околу половина, попознати како бубрежиња. Нивното повторно актуелизирање почна со колекциите на големите модни куќи Gucci и Prada, а брзо стана омилен моден додаток на трендсетерките и блогерките. Ова практично и модерно парче е наменето за сите девојки во постојани движење, кои сакаат покрај себе да ги имаат неопходните нешта, како телефон, клучеви и пари, и немаат време да ги бараат во чантата.
Бубрежињата во студените есенски денови се своевиден моден додаток што се носи над палтото, капутот, или под нив, како колан. Најпопуларните се моделите на Gucci со препознатлото лого, од кадифе или кожа. Застапена е широка лепеза на тонови, како црна сива и кафена, но и впечатливо црвена, розова, виолетова и сина. Посмелите избрале и металик модел.
Се носат врз карираните палта или ролките, се комбинираат и со цветните фустани и здолништа, а совршен спој се со сите модели од џинс. Може да бидат во тон со останите додатоци, а често се носат и со уште една торба, без разлика дали тоа е ранец, поштарска чанта или торба за в раце. Некои не ги ставаат само на половината, туку и ги префркаат накрсно околу градите или на рамо. Ова е парче што можете да го носите повеќе сезони и со разни прилики, а е наменето и за жени од сите генерации што сакаат функционални креации.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари