Младата дизајнерка Викторија Арсовска ќе се претстави со модна ревија на есенското издание на Моден викенд-Скопје со колекцијата наречена „Маршот на боговите“, во која креациите ќе ги асоцира на статусот на жената во времето на француската револуција и нивната борба за права и еднаквост. Ревијата на Викторија е закажана за 22 октомври, во 20 часот во Хотел Мериот. Во деновите пред ревија, таа во следниов прашалник на Stylist.mk открива детали за новата колекцијата, и зборува за интересот во модата и досегашните ангажмани на разни проекти.
*Новата колекција е именувана… „Маршот на боговите“ (колекција за есен – зима 2017)
*Инспирација и опис на колекцијата… Колекцијата брои 12 аутфити, има комплексност во кроеви, иновативност во спојот на материјали и колор кој пресликува една скриена емоција. Содржи монохроматски израз на неколку тонови на црно, истите во одредени модели се вкрстени со беж нијанси.
Завлезено е во рамките на периодот на корсетите задржувајќи се на статусот на жената како пасивен граѓанин во времето на француската револуција, односно нивната борба за права и еднаквост, револуцијата која ја преживуваат и нивното марширање кое е основата на статусот кој една жена го ужива подоцна, односно денес.
Дизајнерката внесува женственост и сексапил во креациите
Презентирана е женственост и сексапил преку кроевите инспирирани од машки униформи и преку машката грубост на посебно избрани материјали. Корсети подзатскриени со капути и елеци од чоја и кожа, свилени фустани во комбинација со кожни каиши и метални копчиња, додека лелеавоста на истите се противи на крутиот штоф.
Колекцијата е еден приказ на нејзиниот храбар чекор, како дама и бунтовник истовремено, како доилка и војник во една паралела, како љубовница во панталони која ужива во разни разврати и скандали кои се табу теми.
*Од претставувањето на Моден викенд очекувам… Очекувам критика, перцепција на колекцијата индивидуално и апсорпција на еден приказ на уметноста преку парчиња облека која носи една естетика која мене лично ме карактеризира и воедно ја презентира мојата работа. Воедно се надевам дека годинешното мото #stopthetrafiк навистина ќе успее да допре до колективитетот и ќе ја поттикне свеста кај истите за неконсумирање облека од брендови кои вршат експлоатација врз работникот.
Модел од ресорт колекција 2016/ Актерката Ана Стојановска носи модел на Арсовска во видеоспот на Лозано/ Пејачката Еги носи фустан на дизајнерката на фестивалски настап
*Мојата модна приказна почна… Интересот за мода започна во годините кога веќе бев сигурна дека уметноста има голем удел во моето тогаш сегашно, а и понатамошно развивање како личност. Решив по завршувањето на гимназија да го почнам долгиот пат кој водеше до влезот на модниот свет, на моја огромна чест и задоволство добив шанса професор да ми биде Александар Ношпал, човекот кој даде една добра основа на модната сцена во Македонија, и воедно несебично пренесе знаење, овозможи пракса и ми ги покажа првите правци за исцртување на мојата модна приказна. Сè она што успеав да го консумирам во текот на моите додипломски студии, праксата што ја стекнав работејќи на различни проекти и упорноста ми се основа на она што го презентирам денес.
Битолската водителка Неда Маретиќ во креација на Викторија на филсмкиот фестивал Браќа Манаки
*Најважните досегашни професионални ангажмани… Денови на претприемништво 2009; FWSK 2010 групна ревија на студентите на Фон Универзитет -тема филм -колекција Кабаре; денови на претприемништво 2010; FWSK 2010 -проект Пелистерка; Аларм фестивал – групна ревија од рециклиран материјал; костимографија на претставата „Жени без маж и ништо повеќе“ во режија на Софија Ристевска -Интимен театар 2013; волонтер и асистент на неколку театарски претстави; соработка со повеќе македонски естрадни уметници за стајлинг или изработка на костуми меѓу кои соработки со Влатко Лозановски како негов личен стилист, спот на Воби Мојсовски, Тамара Тодевска за песната „Шила“, повеќекратна соработка со Наташа Малинкова, стајлинг за спотот на групата „Етносфера“ за композицијата „Копнеж“, дизајн и стајлинг за неколку појавувања на Еги на Скопски фестивал и Макфест; 2013 Евровизија – заедно со мојот колега Папаз го дизајниравме костимот на Лозано; реализирање на ресорт колекција 2016; отворање на мое модно студио во 2016 година.
*Стил препознатлив за моите креации… Геометриски форми кои ја оцртуваат женската силуета, контраст, сексапил, женственост.
*Мој моден идол… Marlene Dietrich – нејзината безвременска убавина, нејзините манири , начин на живот и секако стил.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари