Во зградата на музичкото студио Fames во скопската населба Автокоманда од неодамна e лоцирано новото гастро катче Fames Bistro. Сопствениците на студиото во кое се снима и продицира музика за познати филмови и серии, Од (Aude Nassieu Maupas) и Лоран (Laurent Kopitz), десет години се во Скопје и го водат Fames, но одлучија покрај музика да понудат и добра храна во нивното новоотворено бистро.
Од и Лоран со амбасадорот Тимоние и градоначалникот Георгиевски
Stylist.mk имаше неизмерна чест да присуствува на настанот по повод отворањето на Fames Bistro со внимателно одбрано друштво го пробавме менито на познатиот готвач Марк де Јонг. По оваа пригода во бистрото гости беа францускиот амбасадор Кристијан Тимоние, градоначалникот на Гази Баба Борис Георгиевски, претставници од Француската амбасада во Скопје и од општината, како и дизајнерката Лидија Георгиева, гости од уметничката и бизнис сферата.
Марк де Јонг и Гоце Mарков од „Тиквеш“
За тој ден Марк де Јонг подготви мени со француска кујна, но направи фузија со наши состојки и вметка македонски шмек. Со храната беа послужени нови француски вина од ексклузивната колекција на „Тиквеш“, Chateau de Gourdon. Почнавме со канапе со ракчиња и со малку бело вино, со што ни се разбудија непцата за следниот оброк.
Фузијата на храната Марк ни ја покажа во вториот оброк користејќи наша пастрмка, но на поинаков начин во форма на тартар. Со тартарот од пастрмка со авокадо, цитрон, копар и сос од цвекло, беше послужено бело вино Terrasse au soleil.
Да се подготви патка бара кулинарска умешност, а филето од патка што го пробавме беше извонредно. Патката беше послужна со сос од редуцирано црвено вино, гоџи бобинки и пире од компири и од тиква, а од вината најдобро одговараше црвеното Vase de Pierre.
Десертот беше малку поинаква интерпретација на овошјето – супа од праски, крајно освежителна, со сладолед од ванила и вкусен бисквити ароматизирани со свежи тревки. Со овој десерт вистински погодок беше розе виното Mistral au Jardin.
Желбата на Fames Bistro e да понуди иновативни јадења базирани на француската кујна и со атрактивни цени. Ова место е насочено кон културата и е отворено за организирање на сите видови настани. Бистрото е отворено е секој работен ден од 9 до 21 часот, а за викендите од 12 до 19 часот. Секојдевно се нуди дневно мени и специјалитет на денот.
Нема коментари