Модниот викенд-Скопје изминатите девет сезони се покажа како успешен расадник на нови модни сили. Токму на оваа манифестација првпат се претставија повеќе, сега веќе етаблирани, дизајнери и модни куќи. Меѓу новите модни надежи на ова издание на FWSK е креаторката Ивана Јованоска. Таа на 5 април во салонот на „Ауди-Порше Македониjа” ќе ја претстави колекцијата Pure Vision, за сезоната пролет-лето 2014.
-Низ линијата е прикажан подвигот на жената за доминација и истата е инспирирана од потребата за гламурозен, софистициран, елегантен и моќен изглед. Инспирацијата ја црпам од секојдневието и од галантните работи кај една жена, од културниот и дамски начин на изразување преку говор, движења, гестикулаци, односно од самиот бон-тон на однесување-вели Ивана.
Во линијата застапни се елегантни парчиња и нежни тонови, а преовладува златната боја, која креаторката ја опишува како „симбол за вредноста и префинетоста кај жената“. Останатите нијанси на нежни бои ја претставуваат онаа убавина која секоја жена ја прави да биде понежната половина. При создавањето на моделите се водела од светските модни трендови, притоа имала на ум дека класиката и елеганцијата никогаш не излегуваат од тренд. Линијата ја опишува како софистицирана и моќна, наменета за дами со самодоверба.
- Ревијата е замислена со интересни детали и се надевам дека ќе остави позитивен впечаток. Со деби-учеството на FWSK очекувам да допрам до јавноста и да ги запознаам со мојата креативна страна, и воедно преку оваа презентација очекувам дел од понежната половина со Pure Vision (чиста визија) да се пронајде во одредено парче… За судбината на колекцијата оставам да пресуди јавноста,колку и како ќе биде прифатена тоа зависи само од дамите и нивниот вкус и стил. Колекцијата ќе биде изложена веднаш по ревијата во кафе бар „Концепт 37“. Таму ќе може да се набават моделите, но и во моето ателје близу Католичката црква во Скопје-вели таа.
Јованоска од најраното детство пројавила интерес за модата.
- Уште како мала цртав фустани и парчииња гардероба, но без тело, бидејќи не знаев како. Подоцна со текот на времето започна се подлабоко да ме интересира уметноста општо. Ме интересираше слкарство, фотографирање, моден дизајн, шминкање… Инспирацијата да започнам да се занимавам со мода отсекогаш била убавата жена. Една од моите идоли, муза, инспирација која од секогаш влијаела на мене, за која сметам дека ги поседува сите женски квалитети е Моника Белучи. Од светската мода би одвоила неколку брендови: „Гучи“, „Луј Витон“, „Барбери“ и „Шанел“-вели таа.
Ивана Јованоска
Објаснува дека постепено созревала и се надградувала во поглед на модата и работела зад затворени врати, но смета дека ова е вистинскиот момент да се прикаже во јавност. Во средно училиште учела на отсек за моден дизајн, но продолжила со студии по европско право.
-Сметав дека тоа ќе биде нешто што ќе го работам, меѓутоа желбата за модата преовладуваше многу повеќе и решив да и се вратам на мојата креатиивна страна и да го работам тоа што навистина го сакам и ми причинува задволство…За во иднина ќе оставам работите да се одвиваат чекор по чекор, таков е и самиот мој концепт на работа. Оваа работа ми причинува големо задоволство, ќе работам и понатамуа, ќе подготвувам модели за следната сезона, есен-зима 2014-15. Планирам да направам и приватна ревија сè со цел средствата да бидат донирани во хуманитарни цели-вели на крајот Ивана.
Нема коментари