Дизајнерката Ирина Тошева во пресрет на новото издание на Моден викенд-Скопје најавува два проекти – на 24 октомври ќе претстави нова колекција на ревија во Музејот на Македонија, а во рамките на модниот настан ќе ја презентира и соработката со македонската фабрика „Цеботекс“. Десетина дена пред евијата со Ирина зборувавме за концептот на колекцијата што ја осмислува и подготвува периодов и основните инспирации за новите креации.
-Главната инспирација е домот и неговата топлина низ призма на урбаниот живот. Интересно е што овој пат за прв пат соработувам со наш значаен уметник, со кој делиме слична естетика и шарена визија. Изработката на колекцијата за оваа есен-зима 2015/16 е поддржана од Министерството за култура и традиционалноќе биде претставена на Модниот Викенд во Скопје. Ова е осма колекција што ја претставувам на овој начин.
Инсерти и инспирации за новата колекција
Какви парчиња се застапени и за кои бои и материјали се одлучи оваа сезона?
-Младешките и „кежуал“ варијанти повторно се присутни како мој заштитен знак. Преовладуваат весели бои, многу разиграни принтови и природни материјали. Ја продолжувам и соработката со My:time чиј накит и часовници одлично ги надополнуваат моделите, а тука се и чевлите од Chantel и чорапите изработени специјално од La Dama.
Вообичаено твоите ревии се пропратени со македонска музика, размисли ли за концептот за новото претставување и за музиката?
-Ревијата ќе се оддржи во сабота, 24 октомври со почеток во 21 часот во Музеј на Македонија. Повторно ќе користам македонска музика, а со сите елементи мојата приказна и позитивни вибрации се надевам дека ќе ги почувствуваат сите присутни.
Фото: Skopje Casual
На овој Моден викенд, како дел од проектот „Професионално менторство, соработка и размена на знаења и техники меѓу дизајнерите и фабриките“, најавена е твоја соработка со македонската фабрика за спортска гардероба „Цеботекс“. За што поточно станува збор?
-Нашите фабрики нудат одлична изработка и квалитет, но и застарени дизајни на пазарот. Проектот е од големо значење и за двете страни: дизајнерите и фабриките. Ме радува можноста и довербата дадена од „Цеботекс“ и се надевам дека ова ќе прерасне во долгорочна соработка. Ќе биде изработена капсулна спортска колекција и презентирана при крајот на годината. Јас ќе бидам задолжена за дизајните и кроевите, кои потоа во различни величини ќе бидат изработени во фабриката и дистрибуирани во спортски продавници низ земјава. Се надеваме на позитивен одѕив.
Кои беа главните проекти што изминатиов период ги работеше и кои клучните планови за во иднина?
-Изминативе месеци бев фокусирана на промоцијата на минатата колекција „Енхалон“ и онлајн-продавницата, работев и на интересни проекти со уличното списание „Лице в Лице“ во улога на стилист, а започнав да соработувам со „Нокаут“. Моментално сум целосно посветена на новата колекција и со нетрпение ја очекувам ревијата и објавувањето на едиторијалот. Следниов период ми претстојат и интересни предизвици како соработката со „Цеботекс“ и курсот по моден дизајн во „Кариера +“.
Нема коментари