Модните следбеници и љубители на урбаната женственост на дизајнерката Јована Филиповиќ со нетрпение ја очекуваат новата колекција што ќе биде претставена на 23 октомври, на модна ревија закажана за 19 часот во Музеј на Македонија, како дел од програмата на претстојното издание на Моден викенд-Скопје. Кога ја прашавме талентираната креаторка за клучните зборови, имиџи и инспирации за новите креации, таа ни наброи „Архитектура, мода, уметност, иднина. Нео футуризам!“.
-Оваа сезона сите патишта водат кон иднината. Кон некое идно време каде жената е едноставна, смела, чиста, со еден збор – совршена – ни рече дизајнерката.
Јована ни откри и две фотографии на бели креации, како навестување за нејзината нова модна и футуристичка приказна.
-Секогаш, од која и насока, инспирација да тргнам, апсолутно секогаш моите колекции се сведуваат на елеганција, женственост, урбаност. Исто важи и за формата, боите и кроевите. Колекцијата за есен-зима 2015/16 има изразена монохроматска комбинација на бои и минималистички форми надополнети со рачно изработени додатоци.
После претставувањето креациите од новата колекција може да се најдат во нејзиното ателје, но ќе се продаваат и online преку веб сајтот Bastet Noir. Во декември, колекцијата ке биде достапна и во Швајцарија, на третиот по ред SKP Pop-UP Store. Филиповиќ покрај успехот на домашната сцена, за што доби признание и од Stylist.mk за најдобра колекција на десеттото јубилејно издание на Моден викенд, успешно се презентира и на интернационалниот пазар.
-Годинава, 2015-та, морам да признам дека имав креативна „експлозија“ проследена со навистина многу работа и убави проекти. Колекцијата за есен-зима 2015 веќе ја промовирав во Париз, на Paris Fashion Week, како дел од шоурумот BeNext Showroom и на Shanghai Fashion Week, како дел од Alter Showroom. Тоа беа два настани кои морам да признам навистина многу влијаеа на мојот досегашен начин на работа. Токму тоа влијание и ме натера да го отворам новото студио, кое сега освен како модно студио функционира и како шоурум за моите колекции. Со ревијата на 23 Октомври на Моден Викенд Скопје, ќе ја заокружам оваа продуктивна година и со широки раце ќе ја пречекам 2016-та…
Нема коментари